我唔知佢知唔知我知(1)：「香港獨立」vs「永續基本法」

「港獨」係分離主義，世界上無任何國家會容許自己嘅人民搞分離主義。但更重要嘅一點係當有人提倡「港獨」，中共就會「打壓分離主義」，呢個原因非常合情合理，外國無辦法干預。


但如果變成「永續基本法」，就係要求中共履行承諾，根據《基本法》俾香港有普選。咁只不過係要求中共俾返我地本來就應得嘅嘢，一啲問題都無。


「但如果要求中共履行承諾，咪即係承認中共係合法管治香港？同埋如果中共反口，唔俾香港人有普選，又可以點呢？」


中共可以合法管治香港，係根據1984年嘅《中英聯合聲明》，係受到國際公認嘅，香港人無權亦無原因作出反對。


中共確實有可能反口，不過呢個疑慮同我之前所講嘅係兩回事，要分開嚟睇，並且係一個先一個後：要求中共俾返普選係一回事，中共反唔反口係另外一回事。無論中共反唔反口，我地都要問咗先。如果中共真係唔俾香港有普選的話，到時外國就會話中共違反《基本法》嘅承諾，咁就有一個合情合理嘅原因去介入。


「哦，原來個重點係要有合理嘅原因。」


仲有喎，假以時日，香港仲係咪合法地受到中共管治？中共仲係咪存在？如果是但一個答案係No，個遊戲規則就已經唔同哂，到時《基本法》已經係一份歷史文件，我地又駛乜跟從呢？