闖蕩過、浪跡過，係時候重出江湖？？

我記性太好，好到一個地步，可以講返以前好多野，以及當中好多細節。

好記得2016年年尾，牧者認為我會慢慢淡出牧區，星期六晚唔會再出現。
而家諗返，係幾準確，2017年中段幾乎無乜點返過。

我keep住問：點解一定要係我自己行入教會，俾其他人見到我？
點解唔係弟兄姊妹行出教會，主動去搵返唔到教會既人？

當時仍然keep住寫blog，但同時減少在Facebook及Instagram分享，一個月可能只有一兩次。
並且無論係咩分享都好，都唔show自己個樣出黎。

一路去到2017年7月，同人去街食飯，先再有人捕捉到我個樣。
佢upload上Facebook時，我要求佢唔好tag我，無特別解釋原因。

緊接著既星期六，我返牧區崇拜，重新出現在眾人面前。
佢地當中有人話：「好耐無見過你返黎啦。隔左幾耐？」
「我見到你有keep住寫文，我知道你仍然存在，但就係見唔到你個人，好似消失左咁。」

當時我無講出口，話我係刻意咁做。
點解？因為我想知道自己同身邊弟兄姊妹關係係點，所以突然製造距離。

「我家陣唔理你！你仲唔即刻走黎搵我？係咪想死？」
我必須承認，呢種諗法好女仔，亦都好任性。
其實咁樣對自己都唔好，傷人又傷自己。所以後尾我無再咁做。

----

以前唔返牧區，至少都仲有星期日個詩班，同埋之後個崇拜。
但到左2017年尾，我決定要退出詩班。
既然無諗住要轉教會，所以好自然地又返左黎牧區。

然後佢地就話：「見到你呢排返得好穩定喎~」
再過多幾個月，佢地話我活躍左好多，又話我係「重出江湖」。

嗯，教會確實係一個江湖。哈哈。