成班麻甩佬一邊睇波一邊燭光晚餐

一直都想去紅茶館食All Day Breakfast，但講左幾年都仲未約得成
結果尋晚照去幫襯，無All Day Breakfast，但晚餐卻充滿驚喜

第一個驚喜在於環境
話哂都係酒店餐廳，望落係好Classy，亦坐得舒服
雖然係星期日晚，但意外地冇乜人
餐桌上有一枝飛利浦的蠟燭燈，所以呢餐都算係燭光晚餐
但係餐廳週圍都有電視播著NOW英超台，坐乜位都可以睇到波
餐廳有D咁既配搭其實幾搞笑

第二個驚喜在於價錢
Menu入面超過一百蚊既Items唔多
廚師推介既扒類當中只有羊架係超過200蚊，其他都係100-200之間
其他例如Pasta、焗飯等好多都係100蚊以下，好難相信酒店餐廳竟然會收得咁平
(我地懷疑呢間酒店餐廳係因為唔駛俾租先可以做到呢種價位)

第三個驚喜在於食物
配餐湯既蒜蓉多士係每人兩塊，又係有少少意外
薯條雖然係粗身無波浪紋，但都係新鮮炸既，仲食到有薯味
野食唔算得係「天下美味」，但收埋加一之後呢種價位仍然係物超所值

第四個驚喜在於服務態度
侍應態度出乎意料地好，我地其中一個人未到既情況下
侍應竟然主動提出可以收番入去「暖住先」
(注意係侍應主動提出，唔係我地主動要求)
可以想像如果我地有點餐酒，侍應應該都會間中走過黎幫我地斟酒
好專業的侍應我見過，但專業表現同有無心係兩回事
呢方面我認為態度比表現更重要

我一直都覺得意粉屋係呃錢，但食過呢餐之後我先開始明白那差異有幾大