所講既都係關於2014年5月18日既遊行活動，以下簡稱「518事件」。
我地睇到後生一輩既弟兄姊妹普遍對遊行有所保留，主要係因為主辦團體以往一直針對同性戀群體但今次又煞有介事咁含糊其詞，雖然係有六個一作口號，但係一樣被人話活動目標好唔清晰；反而無咁後生或已組織家庭既弟兄姊妹卻普遍支持並且親身參與。佢地參與既原因主要係藉著呢次活動重申基督教信仰立場〔亦有講法係趁同志婚姻未立法前率先表達反對立場，不過咁就更突顯左「暗中反同但口中唔承認反同」既矛盾〕。
正如討論佔中一樣，有人贊成有人反對本來就係好正常；應唔應該佔中聖經無講，但聖經卻白紙黑字清楚列明同性戀係神唔喜悅既事；教會唔同人物對於政治立場上既分歧原本話要包容合一，結果而家都互相指責「推到見報」；今次有人主張反對遊行，結果亦被人批評「破壞合一」？喂佢地都係信主，都知道聖經既立場係點。佢地反對既原因係目標模糊，尚且同信仰無直接關係，都竟然被人話。
乜聖經有咁教咩？我淨係知道當巴拿巴同保羅在宣教道路上出現意見分歧時，佢地選擇左分道揚鑣並且互相祝福，尚且無互相攻擊對方或是互相阻礙對方既服侍。果然都係使徒犀利，二千年後既我地竟然無咁既胸襟。
----
呢次518事件開始使人覺得「原來教會唔講政治，但係都識玩政治遊戲」；佢地真係很傻很天真：香港地既達官貴人唔少都有番教會，仲要係規模好大又出名既教會，又有名氣又有財力又多人；新聞會講政治，連電視劇都有辦公室style既政治，咁樣既耳濡目染、咁樣既環境底下教會唔玩政治唔講利益？訓醒未啊你？
----
見到有所謂「後基督徒」既概念。學者眼中會係文化現象；在我眼中係分裂既隱憂。
當我地話無咁後生既前輩唔理解我地時，咁我地又幾時理解過佢地？佢地都需要兼顧家庭、工作、教會群體同服侍，又唔係個個有大專程度識同你講乜野批判性思維，又未必似我地擺咁多時間上網，咁又點能夠期望佢地可以清楚知道所有野既來龍去脈、前因後果？〔就算係同信仰有關既野，無論係幾年前既，又或者係近期尐既，佢地都可以一樣無乜認識。〕佢地卻有額外既人生經驗，足以讓佢地知道每次社會講道德議題時，教會都係不斷讓步而且唔能夠還擊，所以當佢地參與社區關懷時，睇到昔日讓步如何傷害到佢地既關懷對象，感受又會更強烈。難得有一個可以表達訴求既機會，結果又被我地班後生仔搞搞震。咁你話啦，佢地點會明？
教會流失下一代？外面專業人士大把研究大把建議，我淨係講我觀察到既野：老字號既大教會都係比較容易出事——教會太多羊既話教牧同工自然睇唔到咁多，弟兄姊妹容易產生一個個小圈子，仲未計頭先講過既教會政治播。咁我應該為左教會聲譽同所謂「合一」而收聲，定係效法先知同耶穌咁不平則鳴？你仲夠膽同我講咁樣既「教會」係另一個家？
----
延伸閱讀：
1.《從基督信仰的角度對「愛爸媽．愛我家」的提問》
(時代論壇竟然會刊登呢篇文章，證明今次教內意見分歧真係好犀利)
http://christiantimes.org.hk/Common/Reader/News/ShowNews.jsp?Nid=83331&Pid=6&Version=0&Cid=150&Charset=big5_hkscs
2.《518 反照教會的眾生相》
http://faith100.org/518-%E5%8F%8D%E7%85%A7%E6%95%99%E6%9C%83%E7%9A%84%E7%9C%BE%E7%94%9F%E7%9B%B8/3605
3. 《80、90後基督徒的社關及價值觀調查報告2011》
(諷刺既係，作者本身所屬既福音機構正是其中一間出名「反同」、
又被人在各方面批評到體無完膚既福音機構)
http://www.truth-light.org.hk/article/title/n3126
沒有留言:
張貼留言