我唔知佢知唔知我知(9)：特朗普氹掂普京唔出手撐中共

「雖然特朗普喺2016年開始上任，不過佢同中共反枱都只係近一、兩年嘅事，之前都一直搭哂膊頭話習近平係好朋友。」

「咁係因為特朗普首先需要應付俄羅斯。仲記唔記得當時佢畀人爆咗單"通俄門"出嚟？呢單嘢其實真係空穴來風，老侵當時確實有去搵普京傾計。」

「你覺得俄羅斯真係有操縱美國總統選舉？」

「我又唔係美國人，點會知咁多。但特朗普佢自己好明白一樣嘢，就係必須要先過咗俄羅斯嗰關、氹掂普京唔出手撐中共，佢喺總統任期內對付中共嘅計畫先至有機會成功。」

「特朗普憑乜嘢可以氹掂俄羅斯？」

「俄羅斯咁多年來都係想向歐洲擴展。特朗普睇準呢一點，要求普京喺中美格局上從中作梗，咁特朗普就會相應地喺歐洲讓步。所以特朗普喺上任大概一年之後，無端端就話要裁減歐盟嘅軍費。當時佢對住傳媒嘅講法係："你地呢班歐洲嘅死窮鬼，次次都淨係識得攤大手板問美國佬攞錢！我而家就係唔俾錢，你地自己籌旗去應付俄羅斯啦！"」

「普京真係會唔撐中共？」

「俄羅斯同中共之間根本就充滿新仇舊恨。就係因為當年中共同蘇聯反咗面，中共先至會同美國建立外交，掉轉槍頭幫美國對付蘇聯。以前中共會幫俄羅斯買軍火，但而家中共已經識得自己整軍備，俄羅斯反而開始幫蒙古、印度等國家抵制中共擴展。至於普京，佢以前係幫蘇聯政府做間諜，根本恨不得中美兩國攬住一齊死。而家有條癲佬走出嚟話要對付中共喎，梗係買定花生等睇戲啦。」